صحي النوم ايها المواطن

البيان الاول من المجلس الاعلي للهليكوبتر

.ايوه .. الهليكوبتر...يعني استخدام خاصية الزووم اوت للنظر و الحكم علي الامور

تعالولي كده بقي بعيد عن زحمة احنا اسفين يا لافاش كيري و احنا اسفين ايها التنين,بعيد عن زحمة الاضطهاد الطائفي,بعيدا عن يا حبيبي يا شرف,بعيدا عن عمرو موسي انا مش مطمنله,بعيدا عن امن دولة و بدل الرقص,بعيد بعيد علي رأي الست.


عزيزي المواطن,اشكرك علي ايجابيتك المتواضعة في النظر الي الامور,و انا عارفة اني انا و انت جديدة علينا الحدوتة دي و ان المصري اللي جواك تعافي من مرض توقف نموه و ربنا يتم شفاه علي خير. بس للاسف,ده غير كافي علي مرحلة دقيقة - مع المعذرة في استخدام كلمات المخلوع بس اصلها دقيقة فعلا!! - و غير كافي لنهضة المحروسة حاليا.


شكرا ان حضرتك عملت attending علي الايفنت الخاص بنزولك من عدمه لاعطاء صوتك للتعديلات الدستورية. و تاني - معلش يعني لو بضايقك و اصدمك - ان ده برضه مش كفاية!


قبل كل شيء...عارف انا هرغي معاك ليه مع ان كان ممكن منتكلمش مع بعض حاليا عن الموضوع ده؟ اخبط الاحصائية الكئيبة دي! المصري اليوم و التعديلات

قولي يا سيدي رأيك كده؟ قول و سمعني الله يخليك اصل صوت الايجابية واحشني...نازل تعمل ايه؟ "اه التعديلات مكيفاني" و لا "لأ متينة..ترقيع ايه و بتاع ايه" و سمعني اسباب كل من الاختيارين دول. اما لو كنت "مش مقرر" تعالي كده اهمس في ودني مقررتش لسه ليه؟ 


هنقل لكم شوية مواقف من الهليكوبتر بتاعي و لكم التعليق.


1-انا مبسوط جدا من التعديلات. و هي نعم يعني نعم.
ايه مسمعتيش المستشار البشري قد ايه شخص ممتاز في عمله و مشهود له بالنزاهة؟ -- سمعت و الله -- طب اهه! اهه ايه؟ حضرتك عندك فكرة ايه هي التعديلات. لا بس مبدأيا انا موافق. طب اخبط دي بقي عشان تبقي عرفت:  التعديلات الدستورية


2- انا مش متأكد لسه.
مستعجله ليه الوقت في صالحنا. حبيبي...انت عارف التعديلات امتي؟ 19 مارس..اللي هو كمان10 أيام.
و حضرتك شغال ليل نهار مش فاضي غير لمتابعة اخبار وثائق امن الدولة,زكريا عزمي ع الأوربت بيقول انا هو يا ولاد التيت,الكنيسة هتتبني في مكانها و لا لأ (طب ما طبيعي هتتبني في مكانها...و لا اللي اتلسع من الشوربة الزبادي اللي عنده بايظ مش هينفخ فيه؟) 
و طبعا حضرتك مشغول برضه في شغلك و عيلتك و الجو و طــــــــــــبعا لتيوتات و استيتسات بتعبر فيها عن اختراق الهكسوس لنهر النيل و ان جزر القمر بتزغزغ مصر من الصحراء الغربية و ان كائنات كوكب بلوتو زهقوا من عدم وجود الشمس بقالهم سنين ضوئية لا تعد و لا تحصي فيحتلوا مصر بقي ما هي عندها ثورة و ملهية. و طلباتك التي لا تنتهي ب كـــــــــفاية اعتصامات مع ان في واقع الأمر شارع القصر العيني في السنة و نص اللي فاتوا كان صاحب ابشع مرور في المجرة بحالها بسبب اعتصمات من اللي بيقولوا عليها "فئوية" -- مركز انت مع عجلة التنمية المخرمة و بدل متعمل للعربية عمرة اساسا ماشاء الله هتموت و تمشيها ان شا-الله بالزق,احنا ورانا ايه يعني ده اقتصادنا يا جدعان!
ركز يا حبيبي و النبي تكسب في مصر ثواب!

3-انا غير موافق.
و ده اللي تقدر حضرتك تتفضل و تقرأ اسبابه من خلال الروابط التالية و ابوس صوابع رجليك -- علي رأي عمرو سلامة -- كلف خاطرك و اقرأ بسم ربك الذي خلق...و حياة مصر عندك يا شيخ! -- اتفضلوا في الصالون الدستوري الثقافي:

• د.عمرو حمزاوي و رأيه في عموده ع الشروق الجديد
• د.حازم الببلاوي علي المصري اليوم -- ملاحظات علي التعديلات
• هشام البسطويسي علي صفحته علي الفيس بوك: أدعو الشعب المصري لمتابعة طريق الثورة بالتوجه الي صناديق الاستفتاء لرفض التعديلات الدستورية جملة و تفصيلا و تمسكنا بوضع دشتور جديد (البيان سيصدر و حال ظهوره هحطه هنا جنب اخواته)
• عمومية «النقض» ترفض التعديلات الدستورية
• مؤتمر (مصر بكره.. دستور بلدنا)
• فى مؤتمر«مصر بكره.. دستور بلدنا»: المشاركون يرفضون الاستفتاء على التعديلات الدستورية
• رأي القاضية تهاني الجبالي في التعدبلات
• رأي بهي الدين حسن -- من وجهة نظر حقوقية

و كمان احقاقا لحق الرجل النزيهة...الذي احترمه كثـــــــــــــــــيرا. خلونا نسمع رأي المستشار طارق البشري مع مني الشاذلي - الحلقة اللي كانت شغالة و احنا مشغولين مع شفيق و الأسواني و علي فكرة,انا لسه متفرجتش عليه بس هذا الرجل يجب ان نستمع لرأيه. 

ده طبعا ناهيك عن مرشحيين الرئاسة كلهم اللي واضح منهم و المستتر: اساسا في الاساس بربطة المعلم قالوا لأ متينة. انا حطيت رأي البسطويسي بصفته القانونية و ليس بصفو مرشح و لن اضع اراء احدهم عشان متقولوش اقفش ع البنت دي اصلها بتروج فكر نابليون ولا جانكيز خان! -- ده للعلم بس.

و الله الموفق و المستعان

و تعظيم سلام كمان ;)

يسعد صباحكوا و مساكوا